Tila sinilaban ng apoy ang paboritong kabayo na si Daily Burn matapos manalo sa ginanap na PHILRACOM Ratings Based Handicapping System (RBHS) Class 4 (34-39) na inilarga sa pista ng Metro Manila Turf Club Inc. (MMTCI) sa Malvar Tanauan City, Batangas. Kampante ang hineteng si Jeffril Tagulao Zarate sa ibabaw ng kanyang sakay na si Daily Burn na kahit nalagpasan sa unahan ay bumalik muli para durugin ang mga kalaban. Sa umpisa ay maganda ang naging salida ng ating bida na si Daily Burn, ngunit agad na kumaripas sa gawing labas si Eye In The Sky upang makuha ang bandera, kasabay sa tabing balya si King Tiger, habang nagkumpulan sa likuran sina Ridgers, Hamlet at Sister Moon. Sa kalagitnaan ng karera ay biglang umarangkada sa tabing balya ang tersero liyamado na si King Tiger para agawin ang unahan, pero agad siyang sinabayan ni Daily Burn upang hindi makalayo sa harapan, habang bumagsak sa pangatlong puwesto ang segundo liyamado na si Eye In The Sky. Pagdating ng far turn ay tangan pa rin ni King Tiger ang bandera subalit unti-unting dumidikit ang nag-iinit na si Daily Burn kaya bago pumasok ng home stretch ay tuluyan nang nakabalik sa unahan si Daily Burn. Sa rektahan ay lalo pang namaga ang kalamangan ni Daily Burn laban sa nauupos na si King Tiger kaya papetiks petiks na lang si Jeff sa ibabaw ng winning horse habang papalapit sa meta. Sumegundo kay Daily Burn si Ridgers, tersero si Eye In The Sky at si King Tiger ang pumang-apat. Pumoste si Daily Burn ng tiyempong 1:11.8 (23-22′-26) para sa distansyang 1,200 meter.
December 26, 2024