SKY PLUS, LAMANG SA PHOTO FINISH!

Panalo ang tersero liyamadong kabayo na si Sky Plus matapos matuka o maungusan sa meta si Let It Shine sa ginanap na PHILRACOM Ratings Based Handicapping System (RBHS) Class 5 (5 Split) (Placers) na pinakawalan sa karerahan ng Metro Manila Turf Club Inc. (MMTCI) sa Malvar Tanauan City, Batangas. Hindi nagpatalo ang hineteng si Kelvin Abobo sa ibabaw ng kanyang sakay na si Sky Plus na kahit nalagpasan sa unahan ay pinilit pa rin makabalik upang masikwat ang panalo. Sa pagbukas ng aparato ay bumandera antimano ang bida na si Sky Plus ngunit kumaripas din kaagad sa tabing balya ang segundo liyamado na si Happy Julliane upang makipagsabayan sa unahan, habang umaarangkada naman sa gawing labas ang paborito na si Princess Serena. Sa kalagitnaan ng laban ay pansamantalang naagaw ni Princess Serena ang bandera kay Sky Plus, habang bumubulusok sa pangatlong puwesto si Let It Shine at nakakapit sa pang-apat si Happy Julliane. Pagsapit ng far turn ay halos magpantay sa harapan sina Sky Plus, Let It Shine at Princess Serena, subalit kapansin pansin ang matinding pag alagwa ni Let It Shine sa tabing balya kaya unti-unti na nitong nilalayuan sina Princess Serena at Sky Plus. Pagpasok ng home stretch ay patuloy sa pag-arangkada si Let It Shine kaya sumipa na sa tatlong kabayo ang kalamangan nito pero hindi pa rin sumusuko si Kelvin sa kanyang sakay at binira ng todo ang winning horse kaya nagkaroon ng photo finish. Sa huli ay si Sky Plus ang idineklarang panalo ng mga hurado, laglag sa pangalawang puwesto si Let It Shine, tersero si Happy Julliane at si Navy Cut ang pumang-apat. Nakapagtala si Sky Plus ng tiyempong 1:15.6 (24′-23-28) para sa 1,200 meter race.