NAGPANGGAP na air conditioning technician kaya nakapasok at nanloob sa aesthetic beauty clinic na tinangay ang cash na laman ng drawer sa Imus City, Cavite.
Inilaarawan ang suspek na nakasuot ng itim na t-shirt, naka-short at naka-backpack.
Ayon sa salaysay ng isa sa tenant sa 3rd floor ng ER Building sa Brgy Anabu 1, Imus City, nakarinig siya ng kakaibang ingay mula sa D-Royal Brows and Aesthetic Clinic na nasa ikalawang palapag bandang alas-7:50 ng umaga.
Bumaba ito upang alamin at napansin niya na basag ang salamin na pader nito.
Sa imbestigasyon ng pulisya, binasag ng suspek ang salamin na pader at pagkapasok ay tinangay ang tinatayang P20,000.00 cash na nakalagay sa cash box sa loob ng drawer.
Nabatid na nagpanggap na air conditioning technician ang suspeek kaya nakapasok sa naturang gusali at umano’y may aayusin.
Nakalabas ang suspek sa pamamagitan ng pagdaan sa butas ng exhaust fan sa likurang bahagi ng gusali at tumakas sa direksyon ng E. Aguinaldo Highway.
Nagsagaawa ng backtarcking ang pulisya para sa pagkakakilanlan sa suspek. GENE ADSUARA