HINIHINALANG dahil sa awayan sa lupa kaya pinagbabaril at napatay ang 61-anyos na senior citizen sa labas ng kanyang bahay sa Tanza, Cavite.
Hindi na nadala pa sa ospital ang biktimang si Jose Angelito Domingo Aguinaldo, may-asawa, ng Papaya St., Ciudad Verde, Brgy Paradahan, Tanza, dahil sa tama bala ng baril sa kanyang katawan.
Inaalam ang pagkakakilanlan ng dalawang suspek na tumakas matapos ang insidente.
Sa ulat, nakatayo at nagpapahangin ang biktima sa labas ng kanilang bahay bandang alas-7:30 ng gabi.
Dumating ang dalawang suspek at walang sabi-sabing pinagbabaril ang biktima na nagresulta sa kamatayan nito.
Sa imbestigasyon ng pulisya, lumitaw na awayan sa lupa ang motibo sa pagpatay.
Nagsagawa ng backtracking ang pulisya sa Closed Circuit Television (CCTV) para sa mga posibleng dinaanan at pagkakakilanlan ng mga suspek. GENE ADSUARA