WALONG lalaki na sakay ng dalawang sasakyan na Sedan ang pumasok sa bahay ng negosyanteng Chinese national at tumangay ng P100K cash, cellphone at baril ng security guard sa Kawit, Cavite.
Ang Chinese national ay si Yu Yuan Guan, cook habang si Charlie Bolias ay security guard/bodyguard.
Inaalam ang pagkakakilanlan ng walong lalaki na sakay ng dalawang sasakyan na Sedan na hindi naplakahan na tumakas matapos ang insidente.
Sa ulat, dumating ang mga suspek na armado ng hindi nabatid na mahahaba at maiksing kalibre ng baril sa bahay ng negosyanteng Chinese national bandang alas-2:30 ng madaling araw sa Block 30 Lot 8 Narra Ave., Grand Centennial Homes, Brgy Magdalo-Potol, Kawit.
Pagpasok ng mga suspek ay tinutukan ang naabutang tao sa loob na si Guan at ang security/bodyguard na si Bolias saka iginapos gamit ang plastic strap.
Puwersahang kinuha ang cellphone, baril na Norinco cal 45, at cash na nagkakahalaga ng P100,000.00.
Hindi na umakyat ang mga suspek sa ikalawang palapag ng bahay kung saan natutulog umano ang negosyanteng Chinese na may-ari ng bahay.
Matapos nakuha ang kailangan ay tumakas ang mga suspek sa hindi nabatid na lugar.
Nagsagawa ng backtracking ang pulisya sa Closed Circuit Television (CCTV) sa pagkakakilanlan at pag-aresto sa mga suspek. GENE ADSUARA