GAMEIR WINNER, WAGI SA 3YO & ABOVE MAIDEN RACE!

Umigkas ang lakas ng kabayong si Gameir Winner dahilan para magwagi sa ginanap na 3 Year Old & Above Maiden Race na pinakawalan sa Metro Manila Turf Club Inc. (MMTCI) sa Malvar Tanauan City, Batangas. Bagamat nahirapan ay nagawan pa rin ng paraan ng hineteng si Jonathan Basco Hernandez ang kanyang sakay na si Gameir Winner upang makalamang at manalo sa laban. Sa largahan ay nakakuha kaagad ng tatlong kabayong bentahe ang paborito na si Feet Bell kaya agad na kumaskas ang tersero liyamado na si Gameir Winner upang makapitan at hindi mapabayaan ang matulin na si Feet Bell sa unahan. Pagsapit ng back stretch ay hawak pa rin ni Feet Bell ang bandera, nakabuntot pa rin si Gameir Winner at nagkumpulan sa kanyang likuran sina American Ford, Sunshine Jeune at Heart Of Steel. Papasok ng far turn ay nagsimula ng uminit ang ating bida na si Gameir Winner ngunit hindi pa rin nagpapatinag si Feet Bell sa harapan kaya naging balikatan ang kanilang labanan hanggang sa huling kurbada. Pagsungaw ng rektahan ay patuloy ang bakbakan ng dalawang magkaribal ngunit bahagyang nakalalamang pa rin si Feet Bell kaya pagdating sa huling 100 meter ay binagsakan na nang todo ni Unoh ang kanyang sakay dahilan upang makaungos ang winning horse bago tumawid sa meta. Sumegundo kay Gameir Winner si Feet Bell, tersero ang imported horse na si American Ford at si Sunshine Jeune ang pumang-apat. Nakapagtala si Gameir Winner ng tiyempong 1:28.2 (14-23′-23′-27′) para sa 1,400 meter race. .