HULING toma na ng isang lalaki makaraang pagbabarilin ng riding in tandem sa parking lot ng disco club sa Imus City, Cavite.
Isinugod pa sa Medical Center Imus ang biktima na si alyas Christian subalit namatay habang ginagamot bandang alas-5:15 ng umaga.
Inaalam naman ang pagkakakilanlan sa dalawang suspek na magkaangkas sa motorsiklo na tumakas matapos ang insidente.
Sa ulat, bandang alas-4:30 ng madaling araw naganap ang insidente sa parking lot ng 767 Club Disco sa Bgry Palico 4, Imus City.
Una rito ay nag-inuman ang biktima at mga kaibigan nito sa nasabing club.
Pagtapos ng inuman at papaalis na ang magbabarkada na habang naglalakad sa parking area ay nilapitan ng suspek ang biktima at walang sabi-sabing pinagbabaril.
Matapos ang pamamaril ay tumakas ang mga suspek na magkaangkas sa isang motorsiklo sa direksiyon ng Bacoor City.
Mabilis namang isinugod ng mga kasamahan ang biktima sa ospital subalit namatay habang ginagamot. GENE ADSUARA