DAHIL lamang sa paggamit ng bluetooth speaker na hindi ipinagpaalam ay pinagsasaksak at napatay ang kuya ng nakababatang kapatid sa Tanza, Cavite.
Isinugod pa sa Tanza Specialist Medical Center ang biktima na si Michael Verde Flor Bustillos, 53, binate, ng Brgy Amaya 6, Mulawin, Tanza, subalit idineklarang dead on arrival.
Arestado naman ang suspek na si alyas Miegene, 49, binata, nakababatang kapatid ng biktima.
Sa ulat, dakong alas-7:00 ng gabi ay hinanap ng suspek ang kanyang bluetooth speaker.
Pero nakita ng suspek ang kanyang bluetooth speaker na ginagamit ng kanyang kuya at sinita ito na nagresulta sa mainitang pagtatalo hanggang kumuha ng patalim ang una at inundayan ng saksak ang nakatatandang kapatid.
Isinugod ang biktima sa ospital subalit hindi na umabot ng buhay habang naaresto naman ang suspek. (Gene Adsuara)