“LAKAMBINI STAKES RACE”  

Kinoronahan ang paboritong kabayo na si Every Sweat Counts nang manalo sa katatapos na 2024 PHILRACOM “Lakambini Stakes Race” na inilarga sa pista ng Metro Manila Turf Club Inc. (MMTCI) sa Malvar Tanauan City, Batangas. Dumiskarte ang hineteng si Jeffril Tagulao Zarate para maipakita ang tulin sa largahan at tatag sa rektahan ng kanyang sakay na si Every Sweat Counts. Sa pagbukas ng aparato ay bumandera antimano ang bida na si Every Sweat Counts habang nakasunod ang magkakuwadra na sina Over Azooming na nasa pangalawa at High Dollar na nasa pangatlong puwesto. Pagsapit ng medya milya ay tangan ni Every Sweat Counts ang tatlong kabayong kalamangan, humahabol naman sa kanyang likuran sina High Dollar at Over Azooming habang kumakaripas sa pang-apat si The Kiss. Pagdating ng far turn ay matatag pa rin sa unahan si Every Sweat Counts, habang malakas na rumeremate sa gawing labas si High Dollar at gumagapang naman sa tabing balya si The Kiss. Pagpasok ng home stretch ay bakbakan na sa unahan sina Every Sweat Counts, High Dollar at The Kiss habang paparating sina Beltuna at Caring Melody. Lalong naging mainit ang labanan nina Every Sweat Counts at High Dollar sa rektahan ngunit pagdating sa huling 100 meter ay bahagyang umungos ang winning horse. Tinapos ni Every Sweat Counts ang laban ng may isang kabayong bentahe sa sumegundo na si High Dollar, tersero si The Kiss habang si Beltuna ang pumang-apat. Nakapagtala si Every Sweat Counts ng tiyempong 1:41.6 (25′-23-24′-28′) para sa 1,600 meter race sapat upang kubrahin ng winning horse owner na Swakto Elite Fitness Inc. ang ₱300,000 na premyo.