PATAY ang 76 anyos na caretaker makaraang pagsasaksakin sa madamong bahagi ng lote sa Amadeo, Cavite.
Naisugod pa sa Rural Health Unit ang biktima na si Isidro Dimayacyac y Manumbale, may-asawa, ng Brgy Sta Cruz 2, Dasmarinas City, at stay-in sa Sitio Manda, Brrgy Bucal, Amadeo subalit idineklarang dead on arrival.
Kinilala naman ang suspek na si alyas Ralphie, ng Brgy Bucal, Amadeo.
Sa ulat, bandang alas-2:20 ng hapon naganap ang insidente sa madamong bahagi ng lupa na binabantayan ng biktima bilang caretaker kung saan nagtatabas ito ng damo at lumapit ang suspek na kaagad isinagawa ang pananaksak.
Matapos ang pananaksak ay tumakas ang suspek dala ang ginamit na patalim.
Hindi naman binanggit sa ulat kung ano ang motibo sa pananaksak habang nagsagawa ng follow up operation ang pulisya sa pagkakaaresto sa suspek. (Gene Adsuara)