HINIHINALANG akyat-bahay ang tumangay ng tinatayang P55K halaga ng gadget at mga mamahaling sapatos sa Tagaytay City Linggo ng madaling araw.
Base sa Closed-Circuit Television (CCTV) footage, bandang alas-1:00 ng madaling araw ay pinasok ng hindi nakilalang kawatan ang bahay ng biktima na si alyas David sa Purok 62 Brgy Kaybagal Central, Tagaytay City.
Tinangay ang isang HP laptop na nagkakahalaga ng P20,000.00, Samsung tablet na P15,000.00, Adidas na sapatos na P4,000.00, Nike/Jordan na sapatos na P6,000.00 at MK na relo na P10,000.00 o kabuuan na P55,000.00.
Matapos nakuha ang mga ito ng suspek ay tumakas sa hindi nabatid na lugar.
Bandang alas-4:00 na ng madaling araw natuklasan ng biktima ang insidente na agad namang ipinagbigay alam sa pulisya.
Patuloy ang isinagawang backtracking ng pulisya sa Closed-Circuit Television sa pagkakakilanlan at pag-aresto sa suspek. (Gene Adsuara)