DAHIL sa ingay ng alagang aso at pusa ng isang senior citizen ay naging daan ito upang hindi na lumala ang sunog sa residential house sa Dasmarinas City, Cavite.
Sa ulat, bandang alas-12:05 ng hatinggabi ay nagsimula ang sunog sa ikalawang palapag ng bahay ni alyas Marites, 62, ng Block 48 Lot 4 Stockholm St. Summerwind, Barangay Burol Main Dasmariñas City.
Ayon sa may-ari ng bahay na si Marites, natutulog siya sa ibabang bahagi ng bahay at naalimpungatan sa ingay ng kanilang aso at pusa na tila nag-aaway sa 2nd floor.
Umakyat ito at bumulaga sa kanya ang nasusunog na bahagi ng bahay kaya tinangkang apulahin pero lalong lumalaki kaya humingi ng tulong sa kanilang kapitbahay hanggang sa dumating ang mga operatiba ng Bureau of Fire Protection (BFP) ng Dasmarinas City hanggang tuluyang naapula at idineklarang fire-out bandang ala-1:27 ng madaling araw.
Wala namang nasaktan o nasugatan sa sunog na umabot sa P20,000.00 halaga ng pinsala.
Ayon pa sa BFP, faulty electrical wiring ang dahilan ng sunog. GENE ADSUARA